انصار: (د زمري ۱۱ مه)، نیویارک ټایمز ورځپاڼې د دریو ایراني سرچینو له قوله ویلي چې، د ایران ستر مذهبي مشر ایت الله علي خامنه يي خپل هېواد ته امر کړی چې د ایران په خاوره کې د اسماعیل هنیه د وژل کېدو په غچ کې دې پر اسرايیلو مستقیم برید وکړي.
د حماس د سیاسي دفتر مشر اسماعیل هنیه د چهارشنبې په سهار د تهران په شمال کې په خپل کور کې له خپل ساتونکي سره په نښه او ووژل شو.
حماس د اروپایي اتحادیې او متحده ایالاتو له خوا د ترهګر سازمان په توګه پېژندل شوی.
د نیویارک ټایمز په راپور کې د دریو نامعلومو سرچینو په حواله ویل شوي، ایران پلان لري چې په اسرايیلو کې پر پوځي اهدافو د بې پیلوټه الوتکو او راکټونو په مرسته ګډ بریدونه وکړي.
د نیویارک ټایمز د راپور له مخې، له هغو دریو سرچینو چې له دې ورځپاڼې سره یې خبرې کړې، دوه یې د ایران د سپا پاسدران غړي دي.
دغې ورځپاڼې زیاته کړې، ایران د دې احتمال په اړه څېړنه کوي، چې د ایران له خاورې پر اسرايیلو د مستقیم برید په څېر به د یمن، سوریې او عراق له ځینو برخو هم د اسرايیلو پر لور بریدونه وشي.
تر دې مخکې د ایران ستر مشر د هنیه له وژل کېدو وروسته پرون په خپل پیغام کې وویل چې اسراییل په دې کار سره د ځان لپاره سختې سزا ته تیار دی.
اسراییلو تر اوسه په رسمي توګه د هنیه په برید کې خپل لاس لرل نه دي تایید کړي.
ایران د تېرې حمل میاشتې په ۲۶مه هم وروسته تر هغه په اسراییلو سلګونه توغندي او بې پیلوټه الوتکې وتوغولې چې دمشق کې یې کونسلګري د اسراییلو په برید کې له منځه ولاړه او یوشمېر کسان په کې ووژل شول.
URL تعقيب: https://www.ansarpress.com/pashto/32769
